Valsmenn gerðu eina breytingu á liðinu frá því á laugardaginn en Sigurbjörn kom inn fyrir Danna Hjalta.  Fyrri hálfleikur var frekar tíðindalítill.  Valsmenn stýrðu ferðinni en Grindvíkingar lágu tilbaka og voru nokkuð þéttir.  Hinsvegar voru þeir alveg bitlausir fram á við virtust treysta algjörlega á Scott Ramsay.  Valsvörnin réði léttilega við það og átti satt best að segja mjög náðugan dag.

Til tíðinda dró rétt fyrir leikhlé en þá skoraði Pálmi með laglegu skoti eftir sendingu frá Bjarna Ólafi.  Pálmi var svo aftur á ferðinni snemma í síðari hálfleik.  Valsmenn tóku aukaspyrnu á sínum vallarhelmingi, sendu fram þar sem Pálmi skallaði hann á Helga sem sendi hann strax á Pálma sem tók eina snertingu og skoraði svo með góðu skoti frá vítateigslínunni.  Sannarlega snaggaralegt mark og dæmi um hvað okkar menn geta verið hættulegir.

Áfram stýrðu heimamenn ferðinni og Grindvíkingar komust ekkert áfram.  Willum gerði breytingar á síðustu tíu mínútunum.  Albert Ingason, Rasmus Hansen og Baldur Þórólfsson komu inná sem varamenn og það var eftir sendingu frá þeim síðastnefnda sem Pálmi skoraði þriðja mark sitt í uppbótartíma

Greinilegt er að Pálmi er í hörkuformi.  Mikið var talað um fyrir mótið að hann ætti eftir að eiga flott tímabil og greinilegt að töluvert var til í þeirri umræðu.  Gaurinn hefur frábært nef fyrir markinu og er einfaldlega stórhættulegur.  Hann er mögulega okkar X-factor því það er svo mikilvægt að hafa framliggjandi miðjumann sem getur skorað mörk og tekið þannig athygli frá sóknarmönnunum.  Annað markið hans í kvöld var gott dæmi um það hversu hættulegur hann er og eitthvað sem öll liðin í deildinni þurfa að hafa áhyggjur af.

Fyrir okkur Valsmenn var leikurinn frábært meðal eftir vonbrigðin í Keflavík.  Vissulega eru Grindvíkingar nýliðar og ekki skeinuhættasta lið deildarinnar en þeir spiluðu varnarbolta og sem betur fer tókst Valsmönnum að brjóta niður múrinn hjá þeim og náði að taka þrjú stig í leik þar sem flestir af okkar mönnum sluppu vel frá.  Næst á dagskrá er Fylkir í Árbænum.  Við höfum átt misjöfnu gengi að fagna þar í gegnum árin en tókum þó þrjú stig þar í fyrra.  Meira um það síðar.