Valsmenn spiluðu vel og stuðningsmennirnir voru flottir.  Það voru hins FH-ingar sem stálu öllum þremur stigunum á Hlíðarenda í kvöld með marki úr víti í uppbótartíma.  Vítið skildi alla eftir orðlausa en eftir markið voru gestirnir glaðir en Valsarar sárir og svekktir.

Valsmenn voru fyrir löngu búnir að átta sig mikilvægi leiksins í kvöld og því var ákveðið að þjappa mannskapnum með hittingi við braggana í Öskjuhlíð um sexleytið.  Menn æfðu raddböndin og fóru yfir málin á meðan menn fengu sér pylsur og gos og mjöð með.  Andinn var góður í fólkinu enda fyrsti stórleikur sumarsins hjá Val í uppsiglingu.  Auðvitað var fyrsti leikur mótsins stór og svo opnunarleikurinn á móti Fjölni en þessi var samt mun stærri.  Andstæðingarnir FH, liðið sem Valur vann titilinn af í fyrra.  Staðan í töflunni svipuð og á sama tíma í fyrra þegar liðin mættust og Valur sneri við taflinu.  Menn vonuðust eftir endurtekningu á því.  Fréttir úr herbúðum Vals gáfu líka ástæðu til að vera bjartsýnn, Barry að braggast og einnig Gummi og Danni Hjalta.

Þegar leikur hófst sást kunnuglegur karl í vörninni hjá Val sem gladdi okkur rauðu mikið.  Barry Smith mættur aftur, karlinn var í alvörunni kominn aftur.  Þetta þýddi að Bjarni var kominn á miðjuna.  Þetta hafði í för með sér miklar breytingar á leik Vals.  Miklu meira öryggi var í vörninni, liðið gat fært sig hærra upp og samt verið öruggt og gamli góði þéttleikinn kominn aftur.  Stemmningin í stúkunni var einnig mjög góð, sú besta á tímabilinu, nýr söngur kominn inn og allt að gerast.  Úti á vellinum vantaði hins vegar færin en baráttan var mikil.  Barry Smith fékk svo gult spjald fyrir nokkuð saklaust brot um miðjan hálfleik en dómari leiksins, Kristinn Jakobsson, sá svo ekki ástæðu til þess að spjalda Tommy Nielsen fyrir miklu verra brot á Helga Sig.  

Í seinni hálfleik fóru Valsmenn menn að herða á skrúfunum.  Á löngum köflum héldu þeir FH í járngreipum og yfirspiluðu þá.  Valsmenn voru nokkrum sinnum nálægt að komast í ákjósanleg færi en oftast vantaði örlítið uppá.  Rasmus Hansen átti góðan sjens um miðjan seinni hálfleik en hann hitti ekki boltann á fjærstöng.  Helgi átti svo fyrirgjöf sem endaði stöng skömmu síðar og nokkrum sinnum náðu FH-ingar að komast fyrir hörkuskot í vítateignum.   Willum lagði svo allt í sölurnar og setti inn Gumma Ben.  Frábært að sjá hann aftur og Valsstúkan lét alla vita sem heyrðu að Gummi er í miklum metum á Hlíðarenda.  Hinum megin áttu gestirnir svo nokkra sjensa en Kjartan sá við þeim öllum.  Allt virtist stefna í markalaust jafntefli þegar Kristinn Jakobsson dæmdi vítaspyrnu á Barry Smith í uppbótartíma.  Kristinn vildi meina að boltinn hefði farið í hönd Barrys en dómurinn kom öllum á óvart.  Eða þannig kannski, Val gengur alltaf illa þegar þessi dómari er með þeim á grasinu þannig að við hverju er búast.  Arnar Gunnlaugs nýtti svo vítið og sorglegt tap staðreynd.

Eins og áður segir, góð spilamennska, góður stuðningur, grátleg úrslit.  Allavega er ljóst að Valur er á réttri leið.  Aðalatriðið að láta þetta leiðindatap ekki slá sig útaf laginu.  Það er fullt af leikjum eftir og margir af þeim verða góðir, það er ljóst.  Næsti leikur á móti Þrótti á útivelli og við munum taka betur á því þegar nær dregur.