Strax í byrjun leiks sást að Valsmenn ætluðu ekki að gefa Frömurum þumlung eftir. Um miðjan fyrri hálfleik var liðið komið með örugga forystu. Viggó Siguðursson, hinn geðþekki þjálfari Fram, tók leikhlé um miðjan hálfleik enda leikur hans manna í kaldakoli. Það hafði þó lítið að segja og munurinn milli liðanna hélt áfram að aukast út hálfleikinn. Viggó var þó furðu rólegur á bekknum en líklega þarf gamli jálkurinn aðeins meiri tíma til að ná upp sínum gamla takti á hliðarlínunni.

Valsvörnin reyndist ógnarsterk, bundin saman af Sigfúsi Sigurðssyni og Ingvari Árnasyni og með Ólaf Gíslason í banaformi fyrir aftan sig. Framarar voru gjörsamlega ráðalausir og hvað eftir annað varði hávörnin bolta eða lokaði vel fyrir Ólaf í markinu. Sóknarleikurinn gekk einnig eins og vel smurð vél. Hvort um mulningsvél sé að ræða er ekki komið í ljós en haldi Valsmenn sama dampi geta fá lið veit mikla mótspyrnu.

Munurinn á liðunum var mestur 11 mörk þegar Valur komst í 21-10. Þá hrukku Framarar aðeins í gang en einnig má segja að dómarar leiksins hafi farið að jafna út stöðuna aðeins.  Valsmenn fóru að taka ótímabær skot í sóknni og um leið fóru vafaatriðin að falla með Frömurum. Þó var ekki um neinn skandal að ræða en það vakti samt furðu þegar Sigfús Páll var sleginn í andlitið án þess að fá svo lítið sem aukakast og það þegar dómarinn var í tveggja metra fjarlægð. Einnig fékk Sigurður Eggertsson að bragða á handapati Framara án þess að dæmt væri.

Framarar náðu ágætis leikkafla þegar munurinn var orðinn 11 mörk og sýndu á köflum góðan sóknarleik og náðu að leysa full oft framhjá Valsvörninni. Þeir náðu að minnka muninn í fjögur mörk, 23-19 og virtust til alls líklegir. Hins vegar voru skyttur þeirra ekki í takti við leikinn. Rúnar Kárason sem fór illa með okkur á síðustu leiktíð var ekki svipur hjá sjón og átti fjölda vonlausra skota sem annað hvort vörnin eða Ólafur átti í litlum vandræðum með að verjast. Aðrir Framarar létu lítið að sér kveða. Valsliðið hrökk í gang á nýjan leik og landaði að lokum öruggum sigri.

Öflugastir af leikmönnum Vals voru þeir Elvar Friðriksson, Arnór Gunnarsson og Baldvin Þorsteinsson auk þess sem Óli varði eins og berserkur. Einnig var gaman að sjá Arnar Svein Geirsson sýna lipra takta í hægra horninu en á síðasta laugardag kom hann einmitt inn á í leik Vals og KR í Landsbankadeildinni. Þarna er virkilega efnilegur Valsmaður á ferðinni og verður spennandi að fylgjast með hans framvindu.

Umgjörð leiksins var ein sú flottasta sem boðið hefur verið upp á í mörg ár á Hlíðarenda og eiga stjórnarmenn handknattleiksdeildar sannarlega hrós skilið. Fyrir leik gátu áhorfendur gætt sér á prýðisgóðri fiskisúpu, Subway bátum ásamt einum léttum. Í leikhléi var einnig boðið upp á bakkelsi og með því. Glæsilegt í alla staði og voru viðstaddir heldur betur sáttir. Einn stjórnarmanna staðfesti í spjalli við http://valsarar.is að stefnt sé að því halda þessu áfram í vetur og er það vel.

Næsti leikur liðsins er gegn FH í Kaplakrika á komandi fimmtudag.