*Valsarar.is þekkja hina og þessa menn á æðstu stöðum og innstu hringjum, að ógleymdum öllum helstu kjaftakerlingum beggja megin Faxaflóa. Einu og öðru hefur verið gaukað að okkur síðustu daga og eftirfarandi er það allra helsta. Taka ber skýrt fram að þetta eru allt sögusagnir sem ekki þurfa að eiga sér stoð í raunveruleikanum. En eins og gamla konan sagði þá ber ekki að láta góða sögu gjalda sannleikans.

*Þrennum sögum fer af því hvort frumkvæðið að sölu Bjarna sé vegna;
a) fyrirspurna annarra liða
b) frá honum sjálfum komið
eða
c) frá stjórn ÍA
(svo sem ekkert mikið fleiri sem koma til greina...)

*KR-ingar eiga að hafa stokkið inn í samningviðræðurnar um Bjarna Guðjónsson á elleftu stundu.

*Lítil stemmning var á meðal helstu stuðningsaðila KR fyrir kaupunum á Bjarna í fyrstu. Nýr styrktaraðili á að hafa stigið inn á ögurstundu og lýst sig tilbúinn að greiða fyrir félagskipti pilts yfir í KR og þar með snúið fallvötnunum í vestur átt.

*Samkvæmt heimildum Valsara.is leitar hugur Bjarna frekar í Frostaskjólið heldur en á Hlíðarenda.

*ÍA á að hafa gert kröfur um að Hafþór Ægir Vilhjálmsson yrði hluti af skiptunum en á það vildu Valsmenn alls ekki fallast enda pilturinn bráðungur og á framtíðina fyrir sér.

*Enn ein kjaftasagan er að Skagamenn þurfi að greiða Guðjóni 12 mánaða biðlaun vegna uppsagnarinnar. Margar misjafnar tölur hafa verið nefndar varðandi mánaðarlaun Guðjóns en tölur frá 600.000 á mánuði og allt upp í tæplega 1.200.000 kr. hafa verið nefndar. Skagamenn þurfa því að borga allt frá 7,2 milljónum kr. upp í 14,4 milljónir kr. vegna uppsagnar Guðjóns.

*Tvíburarnir eiga að vera mun ódýrari á fóðrum en forveri þeirra í starfi. Semji þeir við ÍA að loknu tímabilinu mun félagið í raun spara umtalsverðan pening við uppsögn Guðjóns til lengri tíma litið.

*Bæjarsjóður á Akranesi hefur áður þurft að stoppa fyrir lekann eftir að félagið fór fram úr sjálfu sér í eyðslu fyrir nokkrum árum. Allar götur síðan hafa stjórnendur ÍA þurft að vinna eftir ströngum kröfum um að halda félaginu réttum megin við núllið.

*ÍA eiga að hafa átt hauka í horni á meðal hinna ýmsu verðbréfa snillinga landsins síðustu ár. Eins og allir vita hefur skóinn kreppt illþyrmilega í þeim bransa og menn sem áður göldruðu fram milljónir standa nú ráðþrota frammi fyrir breyttum markaði. Erfiðara er því um vik hjá ákveðnum velunnurum ÍA til að styrkja hin ýmsu gæluverkefni eins og fótboltann.

*Skagamenn þurfa af þessum sökum að herða sultarólarnar enn frekar. Þeir eru því að selja Bjarna af illri nauðsyn til að ná endum saman við rekstur deildarinnar en er það í raun þvert um geð. Menn meta aðstæður þannig að staða ÍA gæti orðið enn erfiðari að loknu tímabili og markaðsvirði Bjarna gæti þá orðið miklum mun lægra en það er í dag.

Útskýring á (*):

Þessar sögusagnir eru settar fram til gamans og ber ekki að taka alvarlega né sem sannleika.