Á vormánuðum var viðtal á fótbolta.net í Hin hliðin við fyrrum framherja Keflavíkurliðsins og núverandi leikmann Reynis í Sandgerði, Stefán Örn Arnarson . Stefán var spurður hinnar klassísku spurningar hver væri mesti höstlerinn í liðinu. Ekki stóð á svörum hjá Stefáni sem sagði; "Á Suðurnesjum fá allir sitt þannig að það er enginn sem nennir að tileinka sér einhverja staðlaða höstltaktík"

Já Suðurnesjumenn fá allir sitt. Allir nema einn hópur manna. Stuðningsmenn knattspyrnuliðs Keflavíkur.

 

Keflavík er það knattspyrnulið sem má þola lengstan biðtíma allra liða frá síðasta Íslandsmeistaratitli. Þeir eru komnir fram úr KR-ingum í biðtíma milli titla fyrir þó nokkru síðan og aðeins stuðningsmenn Víkings hafa þurft að halda lengur í sér eða frá 1924-1981. Jafnvel þolinmóðustu gæðingar í Keflavík munu varla halda svo lengi út.

 


    

Allt er þó breytingum háð. Ef jarðhræringar á Suðurlandi eru eitthvað til að miða við, þá gæti verið að skjálftinn í vor kunni að vera teikn um stóra hluti suður með sjó þetta árið.

 

Hvurn fjandann á hann við með því spyrja eflaust einhverjir. Skoðum málið nánar.

 

Árið 1964 kom fyrsti Íslandsmeistaratitillinn í hús til Keflavíkur með tilheyrandi gleði í Stapanum. Þetta var stuttu eftir að eldhræringar áttu sér stað undan Vestmanneyjum og Surtsey myndaðist. Gosið í Surtsey hélt áfram næstu árin sem og sigurganga Keflvíkur eða öllu heldur ÍBK. En gullöld Suðurnesjamanna lauk árið 1973 og hefur félagið ekki orðið Íslandsmeistari síðan þá. Sama ár og brast á eldgos í Heimaey. Tilviljun? Hver veit.

 


 

"Blöðru"-klisjan hefur lengi vel verið viðloðandi lið Keflavíkur. Leikmenn félagsins hafa oft á tíðum verið í ógnargóðu formi í fyrstu umferðum mótsins en síðan hefur fjarað undan þeim og sæti um miðja deild verið endanleg niðurstaða.

Árið 1997 hófu Keflvíkingar mótið á að vinna fyrstu sex leiki sína í deildinni og þóttu til alls líklegir. Keflavíkur-heilkennið tók þá yfir, blaðran sprakk með hvelli og liðið vann aðeins einn deildarleik það sem eftir lifði móts. Að vísu unnu Keflvíkingar bikarinn um haustið í fyrsta sinn í 22 ár eftir sigur á ÍBV. Einng slógu í gegn á þessu tímabili ungir menn eins og Jóhann Guðmundsson (sá sem nú er á heimleið) og Haukur Ingi Guðnason.

Keflvíkingar féllu um deild árið 2002 eftir æsilega botnbaráttu við Fram, ÍBV og FH. Keflavík var jöfn á stigum með Fram og ÍBV en endaði með -5 í markatölu, einu marki lakara en Framarar. Tveimur sumrum síðar árið 2004 kom Keflavíkurliðið tvíeflt til baka og varð bikarmeistari sem nýliðar í deildinni líkt og við Valsmenn lékum eftir ári seinna.

Guðjón Þórðarson tók við liðinu á undirbúningstímabilinu fyrir sumarið 2005 en tók ekki slaginn þegar til kom og við tók Kristján Guðmundsson núverandi þjálfari liðsins. Kristján hefur haldið Keflavík við jaðar toppbaráttunnar síðan hann tók við en liðið á þó enn eftir að stimpla sig inn sem alvöru Íslandsmeistara-kandídat undir hans stjórn.

Flestum er í fersku minni hrun liðsins niður töfluna í fyrra eftir markið fræga á Akranesi en í sumar ætla lærisveinar Kristjáns eflaust að gera atlögu að titlinum sem aldrei fyrr. Að loknum fyrri hluta móts sitja þeir einir á toppnum með 25 stig, sex stigum meira en meistaralið okkar Valsmanna.

Líklega má halda því fram að leikurinn á laugardag sé síðasti möguleiki Valsliðsins til að stinga sér inn í toppbaráttuna þetta sumarið. Þrátt fyrir töp okkar manna gegn liðum eins og HK og Fylki, sem bæði hafa átt skelfilegu gengi að fagna, þá er enn stutt í efstusætin en lítið má út af bregða úr þessu. Sigur gegn toppliðinu er því bráðnauðsynlegur ætli liðið sér eitthvað meira en Intertoto sæti í ár.


Heimildir:
http://fotbolti.net/fullStory.php?id=61391:
Hin Hliðin - Stefán Örn Arnarson (Reynir Sandgerði)