Í kjölfar tapleikja Fylkis nú í byrjun móts hefur þjálfarinn Leifur Garðarsson farið mikinn í viðtölum. Eftir Keflavíkurleikinn var Leifur öskuvondur yfir að fá gult spjald frá dómara leiksins og talaði meðal annars um að kvöldið áður hafi hann farið á leik og þar var þjálfari sem hoppaði og skoppaði athugasemdarlaust um hliðarlínuna. Það var einn leikur á dagsskrá það kvöld og þó Leifur hafi ekki þorað að segja það berum orðum þá er það ekki sama hvort um er að ræða Jón eða, í þessu tilfelli, séra Willum.

Ljóst er Fylkismenn hafa sett sér háleit markmið síðustu árin en árangurinn hefur látið á sér standa. Leikmenn eins og Valur Fannar, Guðni Rúnar, Haukur Ingi, Peter Gravesen, David Hannah, Alan Dyring og Jóhann Þórhallsson eru síður en svo ódýrir á fóðrum en um leið hefur þeim mistekist að setja mark sitt á deildina með afgerandi hætti.

Þrátt fyrir mörg kunnuleg nöfn í leikmannahóp Fylkis hefur alltaf vantað einhvern neista upp á að félagið hafi náð að springa út. Kannski er um að kenna lítilli þolinmæði stjórnarmanna eða kannski hafa Fylkismenn bara verið einstaklega óheppnir í vali sínu á þjálfurum og aðkomumönnum.

Ef farið er yfir þjálfaralista Fylkis frá því að liðið kom upp árið 1999 er margt þess vert að skoða nánar. Ólafur Þórðarsson ákvað að víkja sæti til að taka við ÍA og eftirmaður hans Bjarni Jóhannsson leiddi liðið í toppbaráttuna á sínu fyrsta ári. Bjarni klúðraði síðan Íslandsmótinu 2001 á ævintýralegan hátt en varð bikarmeistari um haustið. Fylkismenn voru ósáttir við uppskeruna og við tók Akurnesingurinn Aðalsteinn Víglundsson.

Skagamaðurinn lék nánast sama leik og Bjarni. Tók bikarinn um haustið en mátti horfa á eftir Íslandsbikarnum með þyrlu yfir Faxaflóann viku áður. Aðalsteinn fékk að vísu annað tímabil en þá endaði Fylkir um miðja deild. Þolinmæði stjórnarmanna brast og Þorlákur Árnason var ráðinn eftir að hafa fallið með Val um deild. Láki entist tvö tímabil í Árbænum og náði þar miðlungsárangri en Fylkismenn töldu sig hafa átt að gera betur og því fékk gamli Valsarinn að taka poka sinn.

Árið 2006 var komið að Leifi Garðarssyni. Ýmsir vildu eigna honum heiðurinn að tveimur Íslandsmeistaratitlum FH og héldu fram að í raun væri körfuboltadómarinn Leifur heilinn á bakvið FH veldið en ekki sólpalla-smiðurinn Ólafur Jóhannesson. Á sínu fyrsta ári sem aðalþjálfari sýndi Leifur þó enga meistaratakta. Ef ekki hefði verið fyrir sigur FH á Grindavík í 18. umferð árið 2006 hefði Leifur fallið með sitt stjörnuprýdda Fylkislið.

Stjórnarmenn Fylkis sýndu í kjölfarið áfram sama stöðugleika að einu leyti. Þjálfari liðsins virðist alltaf fá fríspil fyrsta árið og Leifur fékk að sitja áfram við kjötkatlana. Fylkisliðið bætti sig talsvert í fyrra, enda ekki úr háum söðli að detta. Félagið komst upp í miðja deild, var laust við fallbaráttu allt tímabilið og komst í undanúrslit Visa bikarkeppninnar. Flestir reiknuðu með sigri Fylkis gegn nágrönnum sínum úr Fjölni. Leifur, sem jafnframt þjálfun er skólastjóri við Áslandsskóla í Hafnarfirði, féll hins vegar á prófinu þegar til kom og missti því af gullnu tækifæri til að sýna og sanna hæfileika sína gegn sínu gamla félagi FH.

Náist ekki betri árangur í ár en í fyrra má búast við að kunnulegt hljóð komi í strokk Árbæjinga. Viðtöl við Leif eftir fyrstu leiki benda til að hann sé undir miklum þrýstingi og líklega eru Íslandsmeistararnir ekki drauma andstæðingar í slíkri stöðu.

Auðvitað má velta því upp hversu heppilegt það er fyrir okkur Valsara að mæta Fylki á slíkum tímapunkti. Valsliðið kom til leiks á Íslandsmótið með höfuðið lengst upp í skýjum en fékk síðan magalendingu í Keflavík. Eftir 3-0 burst á Grindvíkingum er vonandi að okkar menn séu komnir á rétt flug og mæti með vel stilltu hugarfari til leiks því Fylkismenn gætu orðið nokkuð óútreiknanlegir eftir slaka byrjun.