Þó ljóst sé að Valsmenn verði ekki í slagnum um Íslandsmeistaratitilinn þetta árið, er þó ennþá að einhverju að keppa, ekki síst því að ná að sýna og sanna hversvegna liðið er ríkjandi Íslandsmeistari næstu vikurnar.
Þriðja sætið í deildinni gefur Evrópusæti á næsta ári, og gerir það að verkum að Valsmenn geta stoltir sagst eiga besta lið Reykjavíkur árið 2008.

Í kvöld mæta Þróttarar niðrá Hlíðarenda (á vægast sagt einkennilegum tíma reyndar), til að reyna sig gegn okkar mönnum.

Á meðan Þróttur vann ÍA sannfærandi í síðastu umferð, lágu Valsmenn kylliflatir gegn Fimleikafélagi Hafnarfjarðar, og er því vonandi að liðsmenn komi ákveðnir til leiks til að bæta fyrir Hafnarfjarðarfýluferðina.
Reyndar var sigur Þróttara sá fyrsti í 1 og 1/2 mánuð þannig að ekki er nú beint hægt að segja að gengi Þróttara hafi verið uppá marga fiska í sumar.
Liðið situr þó í 9unda sæti deildarinnar, og sleikir botninn, þó það sé reyndar öruggt með sæti í deild þeirra bestu næsta sumar.
Það breytir þó ekki þeirri staðreynd, að síðast þegar Valsmenn mættu Þrótturum, tóku þeir þá í kennslustund á þeirra eigin heimavelli, og því hlýtur það að geta talist nokkuð raunhæf krafa að áframhaldandi skólun fari fram að loknum þessum frímínútum sem liðið hafa á milli leikja liðanna. Sigur er því markmið sem ætti að vera meira en raunhæft, og þó að dramb kunni vera það sama og fall, er að ýmsu að keppa fyrir okkur Valsmenn, en Þróttarar hafa lítið að vinna að sama skapi.

Það er þó ekki hægt að sleppa því að minna stuðningsmenn Vals á að láta sjá sig á heimaslóðum, og jafnvel kurteisislega óska eftir því að þeir láti í sér heyra. Lífsmark í stúkunni hefur verið með minnsta móti að undanförnu, enda eru sennilega margir svekktir yfir því að hafa misst af titillestinni þetta árið.
Við skulum samt ekki gleyma því, að undir stjórn Willums síðustu ár hafa Valsmenn verið að sýna þann mesta stöðugleika og frammistöðu sem sést hefur á Hlíðarenda síðustu áratugina. Ef 2 stórir titlar og lúkning móts í efstu 3 sætum deildarinnar er ekki gríðargóður árangur, þá þurfa menn eitthvað að íhuga sitt gildismat er varðar árangur.
Nú eru bara 2 3 leikir eftir af tímabilinu, allir gegn Reykjavíkurliðum og báðir 2 þeirra heima og báðir gegn Reykjavíkurliðum. Það þýðir ekkert annað en að enda mótið með stæl á móti bæði Þrótti, Fram og KR, og sýna það að Valur er með besta lið Reykjavíkur í ár. Það þýðir ekkert taut og raul, bara áfram Valur og ekkert bull.