Handbolta stórveldi 21. aldarinnar, Haukar frá Hafnarfirði mæta í heimsókn í Vodafonehöllina í kvöld. Haukar sitja sem stendur í 4. sæti deildarinnar en flestir sérfræðingar spá liðinu enn einum Íslandsmeistaratitlinum næsta vor.

Á síðustu árum hafa Valsmenn háð margar hildirnar við bræðrafélag okkar í Hafnarfirði. Oftar en ekki máttu okkar menn þurfa að lúta í parketið í þessum viðureignum eftir æsilega baráttu.

Í úrslitakeppninni árið 2001 mættust félögin í undanúrslitarimmu. Valsliðið var skipað gömlum kempum á borð við Júlíus Jónasson, Júlíus Gunnarsson, Valdimar Grímsson og Geir Sveinsson sem jafnframt þjálfaði. Við þessa reynslubolta voru í bland efnilegir leikmenn eins og Markús Máni Mikaelsson, Bjarki Sigurðsson, Freyr Brynjarsson (nú í Haukum) og Snorri Steinn Guðjónsson. Auk þeirra var fjöldi pilta sem þurftu að sitja á varamannabekk Geirs þjálfara mest allt tímabilið en hafa þó seinna meir gert garðinn frægann. Ekki má heldur gleyma Roland Val Eradze sem stóð á milli stanganna.

Til oddaleiks kom á Ásvöllum og voru Valsmenn hársbreidd frá því að komast í úrslitin. Á síðustu sekúndum venjulegs leiktíma fékk Valur sókn en Markús Máni, sem þá var rétt að verða tvítugur, átti skot í stöng á lokasekúndunum án þess að Bjarni Frostason þáverandi markvörður Hauka væri hvergi nærri. Framlengja þurfti leikinn og höfðu Haukar betur og urðu síðan Íslandsmeistarar seinna um vorið.

Næsta tímabil á eftir stóð viðureign félaganna í bikarkeppninni upp úr. Miklar breytingar höfðu orðið á Valsliðinu frá því árinu áður og flestir reynsluboltar liðsins voru horfnir á braut. Valur var þó enn með besta markvörð deildarinnar á þessum tíma í Rolandi Val. Snemma leiks fékk Roland að líta rautt spjald eftir samstuð við Jón Karl Björnsson utan vítateigs þegar hinn hæfileikaríki hornamaður Hauka hafði brugðið sér í hraðaupplaup, aldrei þessu vant. Inn á kom Pálmar Pétursson sem þá var tæplega 17 ára gamall. Valsliðið náði að vinna sig inn í leikinn eftir brottvísunina og minnstu munaði að liðið ynni frækinn sigur en allt kom fyrir ekki. Tap á Ásvöllum sem var að verða einhver illvígasti útivöllur sem um gat.

Árið 2004 komst Valur í úrslit úrslitakeppninnar einmitt gegn Haukum en átti ekki erindi sem erfiði. Serían fór 3-0 og unnu Haukar hana sannfærandi. Ári síðar unnu Haukar Val í undanúrslitum keppninnar 2-0 án teljandi erfiðleika.

Ekki er laust við að margir Valsarar hafi vonast til að Íslandsmeistaratitill okkar árið 2007 sem vannst á Ásvöllum myndi verða tákn um vatnaskil í íslenskum handbolta. Kynslóðaskipti virtust vera eiga sér stað hjá Haukum á sama tíma og Valur var að koma upp með ungt og ógnarsterkt lið. Umbreytingatímabil Hauka stóð þó ekki lengi yfir og ári síðar var Aron Kristjánsson búinn að koma þeim á toppinn enn á ný. Brotthvarf Markúsar Mána varð einnig mikil blóðtaka fyrir Val og Óskari Bjarna þjálfara Vals tókst ekki að fylla í hans skarð á síðasta tímabili nægjanlega vel.

Valsliðið í ár hefur sýnt ágætis takta það sem af er en leikirnir hafa að vísu verið óþarflega tæpir. Slíkt er auðvitað betra upp á skemmtanagildið en stundum vill maður bara hafa þetta öruggt svo liðið sé ekki að missa leiki í óþarfa jafntefli.  Breiddin í liðinu er góð með nánast tvo menn í hverri stöðu, nema ef vera skildi á hægri vængnum en liðið saknar Ernis Hrafns töluvert.

Haukar hafa tapað einum leik í deildinni gegn HK en eiga jafnframt leik til góða á okkur. Ef Valur ætlar sér að vera í baráttu um Íslandsmeistaratitilinn þetta tímabil er sannarlega um fjögra stiga leik að ræða enda Haukar komnir með mikla hefð í toppbaráttunni síðustu árin.

Leikurinn í kvöld hefst klukkan 19.30 en súpa og bakkelsi verða á boðstólum bæði fyrir leik og í hléi. Valsarar.is hvetja lesendur til að nýta þetta framtak handknattleiksdeildar og spara þar með í leiðinni útgjöld fyrir einni máltíð í bankakreppunni.