Ólafur Stefánsson tryggði í dag liði sínu Ciudad Real sigur í Meistaradeild Evrópu í handbolta. Fyrir nokkrum dögum vann einmitt Eiður Smári einnig Meistaradeildartitil í knattspyrnu með Barcelona. Heldur betur góður árangur hjá þessum gömlu Valsmönnum á alþjóðavettvangi á innan við viku. Enn og aftur kemur ljós hversu mikilvægt veganestið vill oft reynast sem menn fá á Hlíðarenda.

Valsarar voru mættir í Laugardalinn á leik tveggja Reykjavíkurstórvelda Fram og Vals í kvöld.  Bæði lið höfðu staðið sig töluvert undir væntingum og uppskera beggja liða fyrir leikinn voru mögur fjögur stig.  Því var um sannkallaðan sex stiga leik að ræða og tækifæri fyrir liðin að rétta skipið aðeins af.

Í kvöld sækir meistaraflokkur karla heim erkifjendur okkar í Fram á Þjóðarleikvangnum, enda á Fram ekki heimavöll eins og allir vita. Leikurinn hefst klukkan 19.15 og ljóst er að allt annað en þrjú stig í kvöld hækkar hitastigið undir stól þjálfarans enn frekar.

Eiður Smári Guðjohnsen sem hóf meistaraflokks feril sinn árið 1994 með Knattspyrnufélaginu Val varð í kvöld fyrstur leikmanna Vals til að verða Evrópumeistari og það í Meistaradeildinni sjálfri. Mikið vatn hefur runnið til sjávar frá því að Eiður braut ísinn með meistaraflokki Vals á sínum tíma og gekk svo til liðs við PSV Eindhoven. Nú hefur hann náð hæsta tindi eftir margar lægðir en botninum var án efa náð þegar hann var í hlutverki feitabollu í KR. Valsmaðurinn Guðni Bergsson hjálpaði til við að draga Eið Smára af upp af botninum á sínum tíma og restin er hluti af sagnfræðinni. Glæsilegt Eiður!

Pétur Georg Markan er ekki par sáttur þessa dagana. Í viðtali við Hafliða Breiðfjörð á fótbolta.net virkar Pétur temmilega óánægður með að fá ekki tækifæri en í viðtali við Henrý Birgi virðist hann vera að ganga af göflunum. Hér er viðtalið við Pétur á fótbolta.net: http://fotbolti.net/fullStory.php?action=viewStory&id=76395 og síðan við Fréttablaðið: http://visir.is/article/20090527/IDROTTIR0101/346739834

Það er því spurning hvort að Pétur sé að fylgja í kjölfar þeirra Alberts Ingasonar og Kristjáns Haukssonar sem yfirgáfu Val nú á vordögum. Pétur hefur ýmislegt til síns máls og ótrúlegt að þjálfarinn skuli ekki nýta þá hraðamöguleika sem hann hefur fram yfir marga aðra leikmenn liðsins.