Eyjamenn mæta á Hlíðarenda nú á mánudagskvöldið. Partýtjaldið góða er enn á sínum stað við Fjósið. Gaman væri að sjá helstu úrtölumenn spjallborðsins mæta og létta af hjarta sínu um þær skoðanir sem þeir hafa liðinu og öðru sem tengist félaginu í góðum selskap. Léttiefni fæst á staðnum í fljótandi formi. Menn geta spáð um úrslit hér í athugasemdunum og heimt einn Grænan eftir leik rambi viðkomandi á réttar tölur.

Gæsirnar á Álftanesi munu mæta Valnum frá Hlíðarenda í kvöld. Gera má ráð fyrir ójöfnum leik en menn geta spáð um úrslit í athugasemdakerfinu hér að neðan. Sá sem giskar á rétt úrslit vinnur sér einn léttan og getur vitjað vinningsins í Stuðaratjaldinu á næsta leik gegn ÍBV.

Valsarar voru mættir á Kópavogsvöll á mánudagskvöldið að sjá sína menn etja kappi við Breiðablik. Tölfræðin hefur ekki verið okkur í hag á heimavelli Blika síðustu árin en það virðist vera að snúast við og unnu Valsmenn útileik liðanna annað árið í röð. Skemmtanagildið var ekki upp á marga fiska en líkt og Willum Þór hefur talað um undanfarið þá er sígandi lukka best. Eða eitthvað svoleiðis.

Lélegur sóknarleikur, léleg miðja, lélegt samspil, léleg vinnsla en góður sigur. Valsmenn voru ekki að heilla stúkuna í kvöld en gáfu á móti fá færi á sér. 0-1 sigur og þrjú stig á einum erfiðasta útivelli Vals eru vel þegin sama þótt að fagurfræðin hafi ekki verið með í för. Nánari umfjöllun um leikinn dettur inn um hádegisbilið en þangað til er orðið laust.

Ps. Valsarar mættu bara nokkuð vel í stúkuna þó svo að valsarar.is hafi gert ráð fyrir öðru.  Gunnar Birgisson var þó löglega afsakaður í kvöld á fundi fulltrúaráðs Sjálfstæðismanna í Kópavogi..

Næsti leikur meistaraflokks karla er á martraðarvelli Vals -Kópavogsvelli. Blikar taka á móti okkur en þess ber að geta að Valsmenn náðu langþráðum deildar sigri gegn Breiðabliki á síðasta tímabili. Aftur á móti töpuðum við fyrir HK og einnig slógu Blikar okkur úr bikarnum á vellinum alræmda. Leikar hefjast klukkan 20.00 og hinir vafasömu sófa Valsarar vita líklegast að leikurinn er í beinni á Stöð 2 Sport. Menn verða því löglega afsakaðir með að mæta ekki í Kópavoginn, þótt það sé auðvitað með öllu siðlaust og viðkomandi til háborinnar skammar. En annað eins gengur nú á í Vogi kópsins um þessar mundir þannig að léleg mæting að hálfu Valsara mun fljótt falla í gleymsku. Vonandi.