Síðuskrifari gerðist sekur á dögunum um að fá kökkinn í hálsinn vegna ótímabærar andlátsfregnar af Knattspyrnufélaginu Fram. Samningaviðræður Fram við Fjölni sigldu í strand m.a. vegna þess að verðandi Grafarholtsklúbburinn gerði þá kröfu á Grafarvogsklúbbinn um að sameinað félag myndi heita Fram. Óneitanlega eru ákveðnar spurningar sem vakna varðandi hvað það var sem hratt þessum viðræðum af stað og hvert framhaldið verður hjá öðrum af helstu erkifjendum Vals. Er Fram kannski á leiðinni í þrot?

Handbolti er lífið sagði Guðjón Guðmundsson (Gaupi) eitt sinn við einn af síðuhöldurum og hann ásamt lífinu heldur áfram. Meistaraflokkar kvenna og karla leika við kollega sína í Fimleikafélagi Hafnarfjarðar í Kaplakrika í dag. Kvennaleikurinn hefst klukkan 14 og karlaleikurinn klukkan 16.

Í öðrum fréttum:

*Evrópudraumar meistaraflokks kvenna í knattspyrnu eru úti þetta árið eftir 2-3 tap í morgun gegn Bardolino frá Ítalíu.

*Meistaraflokkur karla í körfubolta vann sinn fyrsta leik í 1. deild í gær gegn Þór Þorlákshöfn 100-74.

*Fyrrum leikmenn Vals þeir Eiður Smári Guðjohnsen og Birkir Már Sævarsson ásamt Valsmanninum Bjarna Ólafi Eiríkssyni eru líklegir til að vera byrjunarliði Íslands gegn Hollandi í dag. Pálmi Rafn Pálmason er einnig í hópnum.

Sumir dansa til að gleyma. Aðrir horfa á handbolta. Bikarkeppni HSÍ hefst í kvöld og tökum við í Val á móti HK. Leikurinn hefst klukkan 19.30.