Sífellt fleiri dæmi benda til þess að Ólafur Jóhannesson sé búinn að vera helsti aðdáandi Vals síðustu árin en í dag tilkynnti landsliðsþjálfarinn hóp sinn fyrir æfingaleik gegn Möltu í næstu viku.

Mesta athygli vekur innkoma Garðars Jóhannssonar sem sló í gegn hjá Val sumarið 2006. Knattspyrnuferill Garðars hafði virst næstum ónýtur meðan hann lék hjá KR undir stjórn Teits Þórðarsonar en vistaskiptin yfir á Hlíðarenda blésu heldur betur lífi í hæfileika hans. Garðar kom eins og stormsveipur inn í Valsliðið og var búinn að spila sig í atvinnumennsku í Noregi stuttu síðar þar sem hann hefur staðið sig með prýði allar götur síðan.

Bjarni Ólafur er einn af tveimur leikmönnum úr Landsbankadeildinni sem komast í hópinn en hinn er Keflvíkingurinn Guðmundur Steinarsson. Bjarni hefur verið við æfingar í Noregir undanfarið og ekki loku fyrir það skotið að hann komist í atvinnumennsku á nýjan leik.

Aðrir Valsarar sem eru að verða fastamenn í landsliðinu eru þeir Birkir Már Sævarsson og Pálmi Rafn Pálmason en báðir urðu þeir Íslandsmeistarar með Val í fyrra. Eiður Smári Guðjohnsen fær hins vegar frí í þetta skiptið.

Fleiri Valsmenn gætu verið í sigtinu hjá landsliðseinvaldinum en hver veit nema að hann fari að velja fyrrum leikmenn frá Val eins og þá Ara Frey Skúlason eða Garðari Bergmann Gunnlaugsson á næstu misserum.